- Monsieur سمير ..
إزاى حضرتك ؟ عامل ايه ؟ بخير؟ يالا أتمنى أن حضرتك تكون فمكان أحسن من هنا بكتير لاحسن هنا بدأت تخنق جامد.
بما إن أنهاردة عيد ميلاد حضرتك ، السنة ال فاتت الهدية كانت حاجة من كتابات بابايا ، السنة دى هاحول تكون حاجة من كتاباتى أنا.
من أول ما عرفت خبر الوفاة وأنا واخدة عهد على نفسى إنى أول تدوينة تكون يوم عيد ميلادك يا Monsieur.
حضرتك كنت أول من شجعنى أول ما عملت المدونة ، ويوميها أنا فاكرة قوتليلى :- "قرات المدونة فيها معانى كثيرة ومؤثرة وأنا مبسوط أنك بدأت من قمة الجبل" وقوتيلى "تصبحى على خير أيتها الاديبة الناشئة" ودى كانت قمة السعادة بالنسبالى.
واما كنت باكتب مقالة عن خالد سعيد ومينا دانيال ، حددنا ساعتها الأفكار مع بعض وحددتلى شوية حاجات أمشى عليها وأما خلصت حضرتك ،ساعديتنى وصلحتيلى الغلطات النحوية وقوتيلى ملاحظاتك.
فاكر يا Monsieur أما جيبت شعر لصلاح جاهين وناقشنا، وقولتيلى أن لو عاوزة تقتيلى بيت شعر، اشرحيه.
طيب .. النوتة البرتقانى الصغيرة ال كنت باخليها طول الدرس جمبى .. حضرتك فاكرها ؟عشان لما تقولى ابيات الشعر ال مش فالمنهج اقوم كتباها وأخليها عندى ؟ (اصل ال Monsieur كان عارف انى بحب الشعر فكان وهو بيشرح دايما يجيب ابيات شعر فالنص)
ولما خلصت كل قطع البلاغة حضرتك مضيتلى على خمسين قرش
"أستاذ ورئيس قسم البلاغة فى الجامعة الكونية أ.د/ ندى 11.11.2011 لغة عربية."
وأما حضرتك قولتيلى ليه اسمى بيتكتب بال(ى) مش بالالف وكنت دايما تشرحلى معانى الاسامى وسبب التسمية لأى حاجة.
هههه طيب ثانية .. فاكرحضرتك أما كنت عاملة كيكة وحضرك أصريت انك تذوقها مع إنها مكنتش حلوة قوى عشان تشجعنى.
وحضرتك كنت دايما تقولى "انتى ؟ انتى مشكلة ! انتى متنفعيش فثانوية عامة ،خشى Bac أو IG اريحلك .. انتى لو ماقتنعتيش بالحاجة ال قدامك عمرك ماهتذاكريها وثانوية عامة كلها دش."
كنت دايما تنادينى بال " فخورة" :)) وحضرتك الوحيد والله ال حببتنى فالنحو والبلاغة ، كنا على آخر الترم نكون حلينا كل القطع ال فى الكتاب الخارجى.
كنت أدخل الإمتحان ، نحو وبلاغة فى جيبى ، نصوص دى لعبيتى ،قراءة أفهم الفكرة الرئيسية والف حوليها ، أدب ملاخصات حضرتك ال متخرش الماية والقصة كنت تحكيهالى كأنها حدوتة وأركز عالحتت المهمة وخلاص ، هو ده العربى كان.
الفكرة فى درس العربى إنى كنت باطلع منه مستفيدة فحياتى بشكل عام فكل حاجة مش مجرد منهج وبيدلق ،كنا بنقعد نتناقش وندردش فأحوال البلد وموضوعات عامة ولو حاجة محيرانى اسأل حضرتك فيها.
والله حضرتك ليك وحشة ،العربى ال انا باخده السنة دى ملوش طعم ،مش زى كل سنة.
الله يرحم حضرتك ، وكل سنة وحضرتك طيب ، معلش السنة دى مش معانا بس فمكان أحسن أكيد.
يارب تعجب حضرتك ومستنية بقى التصحيح بتاع حضرتك ومتخفش يا Monsieur لسه محتفظة بالخمسين قرش والنوتة البرتقانى. :)
